Türkiyə Azərbaycan və Ermənistan arasında münasibətlərin normallaşması istiqamətində atılan addımları və əldə olunan nəticələri müsbət qiymətləndirir.
Türkiyənin xarici işlər naziri Hakan Fidan Azərbaycan və Ermənistan arasında davam edən sülh və normallaşma prosesində əldə edilən irəliləyişləri müsbət dəyərləndirib. O, bu barədə rusiyalı həmkarı Sergey Lavrovla keçirdiyi birgə mətbuat konfransı zamanı açıqlama verib.Nazirin sözlərinə görə, regionda sülhün möhkəmləndirilməsi istiqamətində atılan konkret addımlar artıq əldə olunmuş razılaşmaların və formalaşan sabitliyin praktik şəkildə özünü göstərməsinə imkan yaradır. Fidan bildirib ki, Azərbaycan və Ermənistan arasında davamlı və hərtərəfli sülhün təmin olunması bütün Cənubi Qafqaz üçün mühüm əhəmiyyət daşıyır.Hakan Fidan vurğulayıb ki, uzunmüddətli sülh və sabitlik bölgədə yeni əməkdaşlıq imkanlarının yaranmasına, iqtisadi və siyasi əlaqələrin inkişafına mühüm töhfə verə bilər.Türkiyəli nazir həmçinin “3+3” regional əməkdaşlıq platforması çərçivəsində keçirilən görüşlərin əhəmiyyətinə diqqət çəkib. Onun sözlərinə görə, bu format region ölkələri arasında dialoqun gücləndirilməsi və qarşılıqlı əməkdaşlığın inkişafı baxımından vacib mexanizmlərdən biridir.
