Tibb xidmətində hərbi qulluqçuların xidmət keçəcəyi qurumlar və hüquqi əsaslar müəyyən ediləcək
Elpress.az xəbər verir ki, Ədliyyə orqanlarının tibb xidmətində fəaliyyət göstərəcək hərbi qulluqçuların hüquqi statusunun müəyyənləşdirilməsi təklif olunur.Məsələ Milli Məclisin Hüquq siyasəti və dövlət quruculuğu komitəsinin iclasında müzakirəyə çıxarılan qanun layihəsində əksini tapıb.Təklifə əsasən, Silahlı Qüvvələrin ehtiyatında olan vətəndaşlara və ehtiyatda olan zabitlərə penitensiar xidmət üçün nəzərdə tutulan xüsusi rütbələrin verilməsi qaydaları tibb xidmətinə də şamil ediləcək. Bununla tibb xidmətində vəzifəyə təyin olunan ehtiyatda olan hərbi qulluqçulara xüsusi rütbələrin verilməsi vahid hüquqi yanaşma əsasında tənzimlənəcək.Dəyişikliklərə əsasən, tibb xidmətinin hərbi qulluqçuları penitensiar xidmətin müalicə müəssisələrində, penitensiar müəssisələrin tibb-sanitar hissələrində, eləcə də mühafizə və müşayiət üzrə xüsusi bölmələrin tibb-sanitar hissələrində xidmət keçəcəklər.Onların xidmət keçmə qaydaları hərbi vəzifə və xidmət, hərbi qulluqçuların statusu, hərbi xidmətkeçmə və intizamla bağlı qanunvericilik və digər normativ hüquqi aktlarla müəyyənləşdiriləcək.Bununla yanaşı, məhkəmə ekspertizası idarəsində qulluq edən xüsusi rütbəli ədliyyə işçilərinin xüsusi geyim forması ilə təmin olunmasının da qanunvericilikdə təsbit edilməsi təklif olunur.
