Azərbaycanın Böyük Britaniya üçün təhlükəsizlik və diplomatiya sahələrində əhəmiyyətli tərəfdaş olduğu bildirilib.
Elpress.az-ın Azərtac.az-a istinadən verdiyi məlumata əsasən, Britaniyanın müdafiə məsələləri üzrə dövlət naziri Lord Vernon Koaker Londonda Azərbaycanın müstəqilliyinin 108-ci ildönümünə həsr olunmuş rəsmi qəbul zamanı çıxış edib.Tədbirdə yüksək səviyyəli qonaq kimi iştirak edən Lord Koaker ölkələr arasında mövcud tərəfdaşlığın artan potensialından danışaraq bildirib ki, Britaniya hökuməti Azərbaycanla münasibətləri strateji tərəfdaşlıq səviyyəsinə yüksəltməkdədir. Onun sözlərinə görə, bu, müdafiə və təhlükəsizlik, ticarət, investisiya, iqtisadi inkişaf, eləcə də innovasiya və təhsil sahələrində əməkdaşlığın daha da genişlənməsinə şərait yaradacaq və bu istiqamətlər iki ölkə arasında keçirilən yüksək səviyyəli görüşlərdə müzakirə olunur.Nazir qeyd edib ki, getdikcə daha qeyri-müəyyən və təhlükəli xarakter alan dünyada dost və tərəfdaş ölkələrin rolu əvvəlkindən daha vacibdir və Azərbaycan Böyük Britaniya üçün təhlükəsizlik və diplomatiya sahələrində mühüm tərəfdaşdır.O, Azərbaycanın əldə etdiyi nailiyyətlərə toxunaraq, Britaniyanın Prezident İlham Əliyevin regionda dayanıqlı sülhün təmin olunması istiqamətində səylərini dəstəklədiyini bildirib.Lord Koaker həmçinin ötən ilin dekabrında Azərbaycana səfərini xatırladaraq ölkənin onda dərin təəssürat yaratdığını, xüsusilə Bakıda qədimliklə müasirliyin və Şərq ilə Qərb mədəniyyətlərinin harmoniyasının onu heyran etdiyini qeyd edib.Nazir səfər çərçivəsində Prezident İlham Əliyev və digər dövlət rəsmiləri ilə keçirilən görüşlərin ikitərəfli münasibətlərə, xüsusilə müdafiə sahəsində əməkdaşlığa əlavə təkan verdiyini vurğulayıb.Qeyd edək ki, Lord Koaker həm dövlət naziri, həm də Britaniya parlamentinin Lordlar Palatasının üzvüdür və onun Londonda keçirilən tədbirdə yüksək səviyyədə təmsil olunması iki ölkə arasında əlaqələrin inkişafının göstəricisi kimi dəyərləndirilir.
