Gürcüstan universitetlərində təhsil haqqının dövlət tərəfindən ödənilməsi şərtləri açıqlanıb
Elpress.az xəbər verir ki, Gürcüstanda dövlət universitetlərində təhsil alan tələbələrin maliyyələşdirilməsi ilə bağlı yeni qaydalar müəyyənləşdirilib.Təhsil, Elm və Gənclər naziri Givi Mikanadzenin açıqlamasına görə, yeni sistem çərçivəsində tələbələrin ilk iki semestr üzrə təhsil haqları tam şəkildə dövlət büdcəsindən qarşılanacaq.Üçüncü semestrdən etibarən tam maliyyələşmənin davam etməsi üçün tələbənin əvvəlki semestrdə nəzərdə tutulan kreditlərin minimum 80 faizini toplaması tələb olunacaq. Bu şərti yerinə yetirməyən tələbələrin təhsil haqqının isə 50 faizi dövlət tərəfindən ödəniləcək.Eyni zamanda, tələbələrə növbəti semestrdə əlavə fənlər götürərək çatışmayan kreditləri tamamlamaq və sonrakı semestrlərdə 100 faizlik dövlət maliyyələşməsinə qayıtmaq imkanı yaradılacaq.Yeni maliyyələşmə modelinin Dünya Bankının ekspertləri ilə əməkdaşlıq əsasında hazırlandığı və beynəlxalq təcrübənin nəzərə alındığı bildirilib.
