Azərbaycanın Türk dövlətləri ilə münasibətləri müttəfiqlik səviyyəsində inkişaf edir
Elpress.az xəbər verir ki, Azərbaycanın Türk dövlətləri və Mərkəzi Asiya ölkələri ilə əlaqələri son illərdə yeni inkişaf mərhələsinə qədəm qoyub.Milli Məclisin deputatı Nigar Məmmədovanın sözlərinə görə, Azərbaycanla Mərkəzi Asiya ölkələri arasında əməkdaşlıq qarşılıqlı etimad, bərabərhüquqlu tərəfdaşlıq və uzunmüddətli strateji maraqlar əsasında inkişaf edir. Bu proses həm regiondakı inteqrasiyanın güclənməsinə, həm də Avrasiyanın iqtisadi və siyasi əlaqələrinin genişlənməsinə təsir göstərir.Deputat Azərbaycan-Qırğızıstan münasibətlərinin bu əməkdaşlığın mühüm nümunələrindən biri olduğunu bildirib. Onun sözlərinə görə, iki ölkə arasında siyasi dialoqla yanaşı, iqtisadiyyat, nəqliyyat, energetika və humanitar sahələrdə də əlaqələr genişlənir. Yüksəksəviyyəli qarşılıqlı səfərlər, Dövlətlərarası Şuranın fəaliyyəti və imzalanan sənədlər Bakı-Bişkek münasibətlərinin inkişafını sürətləndirən əsas amillər sırasında göstərilir.N.Məmmədova qeyd edib ki, Azərbaycan Türk dövlətləri ilə münasibətlərini strateji tərəfdaşlıqdan müttəfiqlik səviyyəsinə yüksəltməyə yönəlmiş siyasət həyata keçirir. Türk Dövlətləri Təşkilatı çərçivəsində əməkdaşlığın genişlənməsi və Orta Dəhlizin inkişafı da bu prosesin əsas istiqamətlərindəndir.İqtisadi sahədə qarşılıqlı investisiyaların və biznes əlaqələrinin artdığı, Azərbaycan-Qırğız İnkişaf Fondunun yeni layihələrin maliyyələşdirilməsində rol oynadığı bildirilib.Nəqliyyat-logistika sahəsində də iki ölkə arasında əməkdaşlığın regional əhəmiyyət daşıdığı vurğulanıb. Trans-Xəzər Beynəlxalq Nəqliyyat Marşrutu və Orta Dəhliz üzrə layihələrin Azərbaycan və Qırğızıstanın Avrasiya nəqliyyat şəbəkəsindəki mövqelərini gücləndirdiyi qeyd olunub.Deputat həmçinin Qırğızıstanın Qarabağın bərpasına verdiyi dəstəyə diqqət çəkib. Ağdamın Xıdırlı kəndində məktəb tikintisi ilə bağlı layihə və Bişkekdə həyata keçirilən sosial təşəbbüslərin iki ölkə xalqları arasında əlaqələrin möhkəmlənməsinə xidmət etdiyi bildirilib.
