Milli Müdafiə Universitetinin tabeliyində fəaliyyət göstərən Hərbi İdarəetmə İnstitutunun Xarici Dil Mərkəzində hərbi qulluqçular üçün ingilis dili kursuna start verilib.
Elpress.az xəbər verir ki, kurs ABŞ Müdafiə Dil İnstitutunun (DLI) təlimatçılarının iştirakı ilə təşkil olunub. Açılış mərasimində institutun rəhbərliyi, Xarici Dil Mərkəzinin professor-müəllim heyəti və kursa cəlb edilən hərbi qulluqçular iştirak ediblər.Tədbir Azərbaycan Respublikasının Dövlət Himninin səsləndirilməsi ilə başlayıb. Çıxışlarda xarici dil biliklərinin hərbi qulluqçuların peşəkar hazırlığında mühüm əhəmiyyət daşıdığı vurğulanıb və kurs iştirakçılarına uğurlar arzulanıb.
Dörd ay davam edəcək təlimlər çərçivəsində ABŞ Müdafiə Dil İnstitutunun təlimatçıları tərəfindən hərbçilərin ingilis dili üzrə bilik və bacarıqlarının inkişaf etdirilməsi nəzərdə tutulur. Dərslər zamanı iştirakçıların dinləmə, oxu, yazı və danışıq qabiliyyətlərinin təkmilləşdirilməsinə xüsusi diqqət yetiriləcək.Kursun təşkili və tədris prosesi barədə iştirakçılara ətraflı məlumat verilib. Tədbirin sonunda xatirə fotosu çəkdirilib.
