Elpress.az xəbər verir ki, 20 gün əvvəl həbs edilən tiktoker İlduzə Hacıyevanın (Arzum) apellyasiya şikayəti üzrə məhkəmə prosesi bu gün Bakı Apellyasiya Məhkəməsində başlayır.
Məlumata görə, Arzum Bakı İstintaq Təcridxanasından konvoyun müşayiəti ilə məhkəməyə gətirilib. Onun yaxınları isə məhkəmə binasının qarşısına toplaşıblar.
Xatırladaq ki, Xəzər Rayon Məhkəməsinin iyulun 2-də çıxardığı hökmə əsasən, İlduzə Hacıyeva ölümlə nəticələnən yol-nəqliyyat hadisəsi törətmək və hadisə yerini tərk etməkdə təqsirli bilinərək 5 il 2 ay müddətinə azadlıqdan məhrum edilib.
Müdafiə tərəfi hökmün əsassız olduğunu bildirərək apellyasiya şikayəti verib. Vəkillər Arzumun qəzaya səbəbkar olmadığını iddia edir və onun barəsində bəraət hökmünün çıxarılmasını tələb edirlər.
Bununla yanaşı, zərərçəkmiş tərəf də hökmdən narazıdır. Mərhum Amal Məlikovun həyat yoldaşı Sənubər Muradova Arzumun cəzasının ağırlaşdırılması üçün apellyasiya şikayəti təqdim edib.
Qeyd edək ki, Arzumun təqsirli bilindiyi yol-nəqliyyat hadisəsi ötən ilin iyun ayında baş verib. Qəza nəticəsində 29 yaşlı Amal Məlikov həyatını itirib, həyat yoldaşı Sənubər Muradova isə ağır xəsarətlər alıb. Mərhumun hüquqi varisi və həyat yoldaşı məhkəmə prosesində Arzumla barışmayaraq onun qanunauyğun şəkildə cəzalandırılmasını tələb ediblər.Arzumun məhkəmə zalında həbs olunması cəmiyyətdə geniş rezonans doğurub. Sosial şəbəkələrdə yayılan qəza görüntüləri hüquqşünaslar, nəqliyyat üzrə ekspertlər və ictimaiyyət nümayəndələri arasında geniş müzakirələrə səbəb olub. Hadisənin videogörüntülərini təhlil edən şəxslər Arzumun qəzadakı təqsiri ilə bağlı fərqli fikirlər səsləndiriblər.
Məhkəmə işinə Bakı Apellyasiya Məhkəməsinin hakimi Elnur Nuriyevin sədrliyi ilə baxılacaq. İclasın nəticəsi ictimaiyyət tərəfindən maraqla gözlənilir.
