Neft şirkəti məktəbə altı dildə 300-dən çox Azərbaycan və dünya klassikinin əsərlərini təqdim edib
Elpress.az xəbər verir ki, Yeni tədris ili münasibətilə “Surakhani Oil” hasilat şirkəti Suraxanı rayonunda yerləşən Səttar Bəhlulzadə adına Xarici Dillər Təmayüllü Gimnaziyaya çoxdilli kitabxana hədiyyə edib.“Ədibin Evi”nin təşəbbüsü çərçivəsində yaradılan kitabxanada altı müxtəlif dildə Azərbaycan və dünya klassiklərinin 300-dən çox əsəri yer alıb. Kitablar neft buruqları formasında hazırlanmış xüsusi rəflərdə yerləşdirilib.Kitabxananın açılış mərasimində gimnaziyanın müəllim və şagirdləri ilə yanaşı, Milli Məclisin Suraxanı rayonundan deputatı Qaya Məmmədov, “Ədibin Evi”nin direktoru Şəfəq Mehrəliyeva və “Surakhani Oil” şirkətinin nümayəndələri iştirak ediblər.Tədbir iştirakçıları təhsil müəssisəsinin sinif otaqları və laboratoriyaları ilə tanış olub, şagirdlər üçün dövlət hesabına fəaliyyət göstərən yataqxana və yeməkxanaya baxış keçiriblər. Daha sonra yuxarı sinif şagirdləri ilə dəyirmi masa təşkil olunub.Şirkətin departament direktoru Kərim Aşurov çıxışında müasir əmək bazarında, xüsusilə enerji və neft sektorunda xarici dil biliklərinin əhəmiyyətini vurğulayıb. O, texniki bilik və peşə bacarıqları ilə yanaşı, dil biliklərinin də gələcək mütəxəssislər üçün vacib olduğunu bildirib.Şəfəq Mehrəliyeva isə çoxdilliliyin dünya biliklərinə çıxış imkanlarını genişləndirdiyini, ana dilində mütaliənin və Azərbaycan klassiklərinin əsərlərinin oxunmasının gənclərin dünyagörüşünün və milli kimliyinin formalaşmasında mühüm rol oynadığını qeyd edib.Deputat Qaya Məmmədov kitabxananın yaradılmasını sosial məsuliyyət və vətənpərvərlik təşəbbüsü kimi qiymətləndirib. O, şagirdlərin yalnız bilik və bacarıqlarının deyil, mütaliə və öyrənmə mədəniyyətinin də inkişaf etdirilməsinin vacibliyini vurğulayıb.Tədbirin sonunda şagirdlər qonaqlarla sevdikləri kitablar barədə fikir mübadiləsi aparıblar.
