Elpress.az xəbər verir ki, aşıq sənətinin görkəmli nümayəndələrindən olan Aşıq Əli Urfan təkcə mahir ifaçı deyil, həm də klassik aşıq məktəbinin dəyərlərini yaşadan ustad sənətkarlardandır.
Onun yaradıcılığında Yunus Əmrə ruhu, Qurbani ənənəsi, Aşıq Ələsgər hikməti və Bozalqanlı məktəbinin sənət nəfəsi öz əksini tapır. Bu baxımdan Aşıq Əli Urfan türk dünyasının ortaq mədəni yaddaşını yaşadan sənətkar kimi qiymətləndirilir.
Sənətkarın yaradıcılığının mühüm xüsusiyyətlərindən biri də klassik aşıq sənətinin ən çətin sınaqlarından sayılan qıfılbəndləri ustalıqla açmasıdır. Bu bacarıq onun təkcə saz ifaçısı deyil, dərin biliyə, məntiqə və ustadlıq səviyyəsinə malik sənətkar olduğunu göstərir.
Aşıq Əli Urfanın sevilməsinin əsas səbəbi isə onun səmimiyyətidir. O, səhnədə olduğu kimi, gündəlik həyatında da təbiiliyini qoruyur, sözü ilə əməli arasında fərq qoymur. Elə buna görə də dinləyicilər onun həm sazına, həm də şəxsiyyətinə böyük hörmət bəsləyirlər.
Aşıq Əli Urfan haqqında danışarkən yalnız güclü ifaçı deyil, həm də milli-mənəvi dəyərləri yaşadan, gənc nəsillərə örnək olan bir sənətkar obrazı ön plana çıxır. Onun sazı və sözü gələcək nəsillər üçün də aşıq sənətinin qiymətli irsi olaraq yaşayacaq.
“…Hansı dağdı zirvəsini qar alan,
Hansı düzdü çiçəkləri saralan…
Kimdi gedib özgəsinə yar olan?
Könüllərin sitəmini bir də çal,
Aşıq Əli, “Dilqəmi”ni bir də çal!”
(Xalq şairi Zəlimxan Yaqub)
