Elpress.az xəbər verir ki, “AzerGold” QSC Kəlbəcərin zəngin təbiətini, qədim tarixini və milli-mədəni irsini əks etdirən yeni qızıl və gümüş xatirə sikkələri kolleksiyasını təqdim edib.
Yeni kolleksiyanın dizaynında Kəlbəcərin folkloru, sənətkarlıq ənənələri və təbii sərvətlərindən ilhamlanan milli ornamentlərdən istifadə olunub.
Sikkənin əsas elementlərindən biri XIX əsrin sonlarına aid Kəlbəcərin qədim xovsuz məfrəşinin ornamentidir. Kompozisiyada bölgənin qədim arıçılıq ənənələrinə və məşhur dağ balına işarə edən arı pətəyi motivinə də yer verilib.
Sikkənin yuxarı və aşağı hissəsindəki 17 simmetrik xətt isə ənənəvi sazın pərdələrini simvolizə edir. Bu element Kəlbəcərin aşıq sənəti və saz ifaçılığı ənənələrinə xüsusi vurğu edir.
Kolleksiyada bölgənin keçmişi ilə yanaşı, onun yenidən qurulması və gələcəyə baxışı da numizmatika sənəti vasitəsilə ifadə olunub.
Kəlbəcər kolleksiyasına müxtəlif çəkilərdə qızıl və gümüş sikkələr daxildir. Qızıl sikkələr 5, 10 və 20 qram, gümüş sikkə isə 20 qram çəkidə hazırlanıb. Məhsullar 999.9 əyarlı Azərbaycanda hasil olunan qızıl və gümüşdən istehsal edilib.
Kolleksiyanı “AzerGold” QSC-nin Bakı şəhərində yerləşən Satış və Mübadilə Mərkəzindən, həmçinin şirkətin onlayn satış platformasından əldə etmək mümkündür.
Qeyd edək ki, Azərbaycanda hasil olunan qızıl və gümüşdən xatirə sikkələrinin və qızıl külçələrin istehsalına 2018-ci ildə başlanılıb. Hazırda şirkətin məhsul portfelində 15 qızıl və 12 gümüş olmaqla, ümumilikdə 27 kolleksiya yer alır.
