Süni intellekt vasitəsilə hazırlanmış reklam çarxında Azərbaycanın məşhur film obrazlarından biri olan “Cəbiş müəllim”in istifadəsi ictimai müzakirələrə səbəb olub.
Elpress.az xəbər verir ki, “Rabitəbank” tərəfindən yayımlanan reklam çarxında “Bizim Cəbiş müəllim” filminin məşhur obrazından istifadə edilməsi müəllif hüquqları və mədəni irsə münasibət baxımından tənqid olunub.
Mərhum Xalq artisti Süleyman Ələsgərovun qızı Sevil Ələsgərova bildirib ki, reklam hazırlanarkən ailə ilə heç bir əlaqə saxlanılmayıb və obrazın istifadəsi üçün razılıq alınmayıb. Onun sözlərinə görə, “Cəbiş müəllim” Azərbaycan kinosunun unudulmaz simvollarından biridir və bu cür kommersiya məqsədli istifadəsi məyusedicidir.
Sevil Ələsgərova vurğulayıb ki, belə hallarda müəlliflərin və hüquq varislərinin razılığı alınmalı, milli-mədəni irsə daha həssas yanaşılmalıdır.
Qeyd edək ki, məsələ sosial şəbəkələrdə də geniş müzakirə olunur və reklam çarxı ilə bağlı müxtəlif fikirlər səsləndirilir.
