Sea Breeze Resort növbəti dəfə dünya musiqisinin ulduzlarını bir araya gətirib.
Elpress.az xəbər verir ki, DREAM FEST 2026 beynəlxalq musiqi festivalı ənənəvi qırmızı xalça mərasimi ilə başlayıb.Festivalın ilk günündə yerli və xarici sənətçilər media nümayəndələri və pərəstişkarları ilə görüşərək təəssüratlarını bölüşüblər. Qırmızı xalçada rəngarəng obrazlar və səmimi açıqlamalar diqqət çəkib.
Azərbaycanın Xalq artisti EMIN festivalın ildən-ilə daha böyük beynəlxalq platformaya çevrildiyini vurğulayaraq qonaqları salamlayıb və tamaşaçılara dəstəyə görə təşəkkür edib.
Müğənni Ani Lorak Bakıya hər səfərinin onun üçün xüsusi əhəmiyyət daşıdığını bildirib.
Alsu isə Azərbaycan mətbəxinə heyran qaldığını etiraf edərək yeni mahnısı **”Kəpənək”**in premyerasını məhz festival çərçivəsində təqdim edəcəyini açıqlayıb.
Xalq artisti Zülfiyyə Xanbabayeva və müğənni Roza Zərgərli belə beynəlxalq tədbirlərdə yerli ifaçıların iştirakının Azərbaycan musiqisinin tanıdılması baxımından mühüm rol oynadığını qeyd ediblər.
Rusiyalı sənətçi Stas Mixaylov Azərbaycanı özünə doğma ölkələrdən biri adlandıraraq övladları ilə birlikdə Bakını və Sumqayıtı ziyarət etməyi planlaşdırdığını söyləyib.
Festivalda ilk dəfə iştirak edən Belarusun “Çəhrayı qızılgüllər” qrupunun üzvləri isə Bakının müasir siması, qonaqpərvərliyi və dəniz mənzərəsinin onlarda xoş təəssürat yaratdığını bildiriblər.
Festivalın ilk konsert proqramında Busta Rhymes, EMIN, Ani Lorak, Alsu, Stas Mixaylov, Brendon Stone, Roza Zərgərli, Zülfiyyə Xanbabayeva, Cheb Khaled, Barbara Berta və digər məşhur ifaçılar səhnəyə çıxıblar.
DREAM FEST 2026 bu il də dünyanın müxtəlif ölkələrindən musiqi ulduzlarını Bakıda bir araya gətirərək Azərbaycanın beynəlxalq mədəni tədbirlərə ev sahibliyi edən əsas məkanlardan biri olduğunu bir daha nümayiş etdirib.
