Pərviz Şahbazov Türkiyənin yaşıl enerji dəhlizi layihəsində iştirakının nəzərdə tutulduğunu açıqlayıb
Elpress.az xəbər verir ki, Türkiyənin mərhələli şəkildə 2032-ci ildən istismara verilməsi planlaşdırılan “Xəzər-Qara dəniz-Avropa” Yaşıl Enerji Dəhlizi layihəsində iştirakı nəzərdə tutulur.Energetika naziri Pərviz Şahbazov Azərbaycan-Türkiyə 5-ci Enerji Forumunda çıxışı zamanı bildirib ki, bu layihə iki ölkə arasında enerji əməkdaşlığının mühüm istiqamətlərindən biridir.Nazirin sözlərinə görə, elektrik enerjisi sahəsində regional əməkdaşlığın genişləndirilməsi Şuşa Bəyannaməsinin müddəalarına uyğundur. Yaradılan enerji dəhlizləri isə regional enerji təhlükəsizliyinin təmin olunması baxımından strateji əhəmiyyət daşıyır.Pərviz Şahbazov Türkiyə şirkətlərinin Azərbaycanın yaşıl enerji layihələrində iştirakının genişləndiyini qeyd edib. O bildirib ki, işğaldan azad edilmiş ərazilərdə inşa olunan 42 elektrik stansiyasının ilin sonunadək istismara verilməsi planlaşdırılır.Nazir həmçinin Kəlbəcərdə 204 MVt gücündə külək elektrik stansiyasının yaradılması istiqamətində Türkiyə şirkəti ilə ölçmə və qiymətləndirmə işlərinin aparıldığını açıqlayıb.Şahbazov Azərbaycanın təmiz enerji gələcəyinə keçid prosesində Türkiyə ilə əməkdaşlığı strateji prioritet hesab etdiyini vurğulayıb.
