Azərbaycan istehsalı zərgərlik məmulatlarına region ölkələrində tələbatın artdığı bildirilib.
Elpress.az “Report”a istinadən xəbər verir ki, bunu Toğrul Abbasquliyev Bakıda keçirilən Azerbaijan Jewelry Show sərgisinin açılış mərasimində deyib.Onun sözlərinə görə, sərgidə yerli şirkətlərlə yanaşı, Türkiyədən olan sahibkar və şirkətlər də iştirak edir. Həmçinin Özbəkistan, Qazaxıstan, BƏƏ, Səudiyyə Ərəbistanı, Rusiya və İsraildən alıcıların və ziyarətçilərin qatılması nəzərdə tutulub.Toğrul Abbasquliyev qeyd edib ki, Azərbaycan zərgərlik məmulatlarına marağın artmasının əsas səbəblərindən biri ölkədə formalaşmış peşəkar zərgərlik məktəbidir.O bildirib ki, Azərbaycan zərgərlik sənəti milli ornamentləri, naxışları və zəngin ənənələri qoruyaraq inkişaf etdirir. Bu səbəbdən sərgidə yerli brendlərin və “Made in Azerbaijan” məhsullarının geniş təqdimatına xüsusi önəm verilir.Assosiasiya sədri əlavə edib ki, son illərdə tətbiq olunan vergi və gömrük güzəştləri də zərgərlik sektorunun inkişafına və ixrac imkanlarının genişlənməsinə müsbət təsir göstərib.
