Azərbaycanda avtonom nəqliyyat vasitələrinin tətbiqi ilə əlaqədar gələcəkdə yeni hüquqi mexanizmlərin yaradılması zərurəti yarana bilər.
Elpress.az APA-ya istinadən xəbər verir ki, bu barədə rəqəmsal inkişaf və nəqliyyat nazirinin müavini Rəhman Hümmətov Milli Məclisin İqtisadi siyasət, sahibkarlıq və sənaye komitəsinin iclasında çıxışı zamanı bildirib.Müzakirələr zamanı deputat Tahir Mirkişili avtonom nəqliyyat vasitələrinin qəza törətdiyi hallarda məsuliyyət və cəza mexanizmlərinin necə tənzimlənəcəyinə dair sual ünvanlayıb. O qeyd edib ki, qanun layihəsində bu məsələlər ətraflı əks olunmayıb.Rəhman Hümmətov cavabında bildirib ki, avtonom nəqliyyat vasitələri ilə bağlı etik və hüquqi məsələlər hazırda dünyanın bir çox ölkəsində müzakirə olunur və bu sahədə vahid beynəlxalq standartlar hələ formalaşmayıb.Nazir müavininin sözlərinə görə, qanun qəbul edildikdən sonra məsuliyyət bölgüsü, istehsalçıların və operatorların hüquq və vəzifələri, sınaq rejiminin tətbiqi, icazə mexanizmləri və digər məsələlər üzrə əlavə normativ-hüquqi tənzimləmələr hazırlanacaq.O vurğulayıb ki, gələcəkdə bu istiqamətdə həm Mülki Məcəlləyə, həm Cinayət Məcəlləsinə, həm də digər normativ aktlara dəyişikliklərin edilməsi gündəmə gələ bilər. Rəhman Hümmətov əlavə edib ki, avtonom nəqliyyat vasitələrinin istifadəsi ilkin mərhələdə olduğundan, hüquqi bazanın təkmilləşdirilməsi prosesi mərhələli şəkildə həyata keçiriləcək
