SOCAR-la planlaşdırılan razılaşmanın “Comstock Resources”un beynəlxalq satış imkanlarını və maliyyə göstəricilərini gücləndirəcəyi gözlənilir
Elpress.az xəbər verir ki, SOCAR-la ABŞ-nin “Comstock Resources” şirkəti arasında planlaşdırılan əməkdaşlığın amerikalı şirkətə təbii qazını beynəlxalq bazarlarda satmaq üçün əlavə imkanlar yaradacağı gözlənilir.Beynəlxalq reytinq agentliyinin qiymətləndirməsinə görə, əməkdaşlıq “Comstock Resources” üçün mayeləşdirilmiş təbii qaz (LNG) sahəsində də yeni imkanlar aça bilər. Bu isə şirkətin xarici satış kanallarını genişləndirməsinə, ticarət və marketinq imkanlarını inkişaf etdirməsinə şərait yarada bilər.Razılaşmadan əldə olunacaq vəsaitin şirkətin maliyyə vəziyyətinə də müsbət təsir göstərəcəyi bildirilir. Gözləntilərə əsasən, vəsaitin bir hissəsi kredit xətti üzrə borcun azaldılmasına, həmçinin bəzi istiqrazların geri alınmasına və korporativ məqsədlərə yönəldilə bilər.Əməliyyat çərçivəsində “Comstock Resources” bütün aktivlərin operatoru olaraq qalacaq. Şirkət “Pinnacle Gas Services”də də nəzarət payını qoruyacaq və sövdələşmədən sonra bu payın 62 faiz təşkil edəcəyi gözlənilir.Bundan başqa, şirkətin Haynesville şist yatağında həyata keçirdiyi birgə qazma layihəsi də müsbət qiymətləndirilib. Layihə üzrə növbəti 12 ay ərzində 27 quyunun qazılması və tamamlanması xərclərinin 80–85 faizinin tərəfdaş tərəfindən qarşılanması nəzərdə tutulur. Layihənin ümumi dəyərinin təxminən 450 milyon dollar olacağı gözlənilir.Qeyd olunur ki, bu əməkdaşlıq “Comstock Resources”un hasilat xərclərini azaltmasına, istehsal imkanlarını genişləndirməsinə və şirkətin maliyyə balansını gücləndirməsinə kömək edə bilər.Bununla belə, sövdələşmə hələ yekun imzalanmadığından şirkətin kredit reytinqində və proqnozunda dəyişiklik edilməyib. Şirkətin maliyyə göstəricilərinin təbii qaz qiymətlərindən yüksək dərəcədə asılı olması da əsas risklərdən biri kimi göstərilib.
