OpenAI ilə yanaşı, daha iki beynəlxalq rəqəmsal xidmət şirkəti Azərbaycanda ƏDV qeydiyyatına alınıb
Elpress.az xəbər verir ki, Azərbaycanda fəaliyyət göstərən beynəlxalq rəqəmsal xidmət təchizatçılarının vergi uçotuna alınması prosesi genişləndirilir. Dövlət Vergi Xidmətinin elektron qeydiyyat portalı vasitəsilə daha üç xarici şirkətin qeydiyyatı tamamlanıb.Dövlət Vergi Xidmətindən verilən məlumata görə, yeni vergi uçotuna alınan şirkətlər Niderlandın “Zoho Corporation B.V.”, ABŞ-nin “Zoom Communications, Inc.” və “OpenAI OpCo, LLC” şirkətləridir. Sözügedən şirkətlərin ƏDV məqsədləri üçün qeydiyyatı 1 sentyabr 2026-cı ildən qüvvəyə minəcək.Vergi Məcəlləsinə bu il edilən dəyişikliklərə əsasən, sentyabrdan etibarən Azərbaycanda elektron ticarət vasitəsilə xidmət göstərən və ölkə üzrə illik dövriyyəsi 10 min ABŞ dollarından çox olan qeyri-rezident rəqəmsal xidmət təchizatçılarının vergi orqanında elektron qeydiyyatdan keçməsi məcburi olacaq.Qeydiyyata alınan qeyri-rezident şirkətlər ƏDV öhdəliklərini özləri yerinə yetirəcək, vergini hesablayaraq bəyan edəcək və dövlət büdcəsinə ödəyəcəklər. Yeni qaydaya əsasən, həmin şirkətlərə edilən ödənişlər zamanı ƏDV-nin banklar tərəfindən tutulmasına ehtiyac qalmayacaq.Dövlət Vergi Xidməti bildirir ki, tətbiq edilən yeni mexanizm rəqəmsal xidmətlər sektorunda vergi inzibatçılığının daha da təkmilləşdirilməsinə, vergi öhdəliklərinin icrasının asanlaşdırılmasına və şəffaflığın artırılmasına yönəlib.Hazırda Azərbaycanda elektron ticarət formasında xidmət göstərən digər qeyri-rezident rəqəmsal xidmət təchizatçılarının da məlumatlandırılması və vergi uçotuna alınması istiqamətində işlər davam etdirilir.
