Ağcabədidə Ağcabədi, Ağdam, Bərdə, Füzuli və Tərtər rayonlarının nümayəndələrinin iştirakı ilə aqrar sahə üzrə yeni Dövlət Proqramının müzakirəsinə həsr olunan regional müşavirə keçirilib. Görüşdə proqramın əsas hədəflərinin izahı, fermer və sahibkarların məlumatlandırılması, həmçinin dövlət qurumları arasında koordinasiyanın gücləndirilməsi məsələləri müzakirə olunub.
Azərbaycan Dövlət Su Ehtiyatları Agentliyinin (ADSEA) sədr müavini İlham Bayramov Ağcabədi rayonunda jurnalistlərə açıqlamasında aqrar sahənin inkişafı istiqamətində hazırlanmış yeni Dövlət Proqramının əsas məqsədləri və nəzərdə tutulan tədbirlər barədə məlumat verib.O bildirib ki, yeni Dövlət Proqramında kənd təsərrüfatının bütün əsas istiqamətləri üzrə konkret hədəflər müəyyən edilib. Proqram çərçivəsində aqrar sektorun inkişafını sürətləndirmək, fermerlərin və kənd təsərrüfatı sahəsində fəaliyyət göstərən sahibkarların imkanlarını genişləndirmək məqsədilə əvvəlki proqramlarda nəzərdə tutulmayan yeni güzəştlər, dəstək mexanizmləri və innovativ yanaşmalar tətbiq olunacaq.İlham Bayramov qeyd edib ki, qarşıya qoyulan məqsədlərə nail olmaq üçün fermerlərin, sahibkarların və digər maraqlı tərəflərin yeni imkanlar barədə ətraflı məlumatlandırılması vacibdir. Bu istiqamətdə keçirilən regional müşavirələr Dövlət Proqramında nəzərdə tutulan tədbirlərin izahı və yerli səviyyədə effektiv icrasının təmin edilməsi baxımından mühüm əhəmiyyət daşıyır.Onun sözlərinə görə, Dövlət Proqramının əsas hədəfi kənd təsərrüfatı məhsullarının istehsalının artırılması, aqrar sahədə səmərəliliyin yüksəldilməsi və nəticə etibarilə fermerlərin və sahibkarların gəlirlərinin çoxaldılmasıdır. Bu proses kənd yerlərində yaşayan əhalinin sosial rifahının yaxşılaşdırılmasına da mühüm töhfə verəcək.İlham Bayramov vurğulayıb ki, dövlət qurumlarının, fermerlərin və sahibkarların birgə fəaliyyəti nəticəsində müəyyən edilmiş hədəflərə çatmaq, regionlarda aqrar inkişafı daha da sürətləndirmək və kənd təsərrüfatında yeni nailiyyətlər əldə etmək mümkün olacaq.
