Elpress.az xəbər verir ki, Azərbaycan gimnastı Selcan Mahsudova Çinin Nankin şəhərində təşkil olunan batut gimnastikası və tamblinq üzrə 39-cu dünya çempionatında fərdi proqramda finala yüksəlib.
Milli komandanın üzvü yarımfinal çıxışında 56,140 xal toplayaraq altıncı yeri tutub. Bu nəticə ona dünyanın ən güclü gimnastları arasında medal uğrunda mübarizəni davam etdirmək imkanı verib.
Diqqətçəkən məqamlardan biri Selcanın Paris-2024 Yay Olimpiya Oyunlarının çempionu, britaniyalı Brayoni Peycini altı pillə geridə qoymasıdır.
Kişilərin fərdi yarışında iştirak edən Maqsud Mahsudov isə 37,850 xalla 20-ci sırada qərarlaşıb.
Bununla yanaşı, Selcan və Maqsud Mahsudov qarışıq sinxron proqramda da finala vəsiqə əldə ediblər. Beləliklə, bacı-qardaş dünya çempionatında daha bir medal şansı qazanıblar.
Qeyd edək ki, Nankində keçirilən dünya çempionatı noyabrın 4-dən 8-dək davam edir.
