Sofian Çakla hesab edir ki, “Sabah” klubunu qarşıda uğurlu və parlaq gələcək gözləyir.
“Sabah”ın sabiq futbolçusu Sofian Çakla keçmiş klubunun inkişafından, Azərbaycan çempionluğundan və gələcək hədəflərindən danışıb. Mərakeşli müdafiəçi komandanın qazandığı uğura sevindiyini bildirib və klubun qarşıdakı illərdə daha böyük nəticələr əldə edə biləcəyinə inandığını vurğulayıb.Çakla qeyd edib ki, “Sabah”da uğurlu layihə qurulub, klubda peşəkar idarəçilik və güclü komanda mühiti formalaşıb. O, azarkeşlərin də komandanın inkişafında mühüm rol oynadığını bildirərək, gələcəkdə “Sabah” tərəfdarlarının Azərbaycanın ən güclü fan qruplarından birinə çevrilə biləcəyini deyib.Futbolçu “Sabah”ın UEFA Çempionlar Liqasındakı şanslarını da dəyərləndirib. Onun sözlərinə görə, futbolda əvvəlcədən nəticə proqnozlaşdırmaq çətindir, lakin komandanın keyfiyyətli heyəti, yaxşı məşqçisi və sabit strukturu uğur qazanmaq üçün vacib amillərdir. Çakla bildirib ki, iki görüşdən ibarət mərhələlərdə hər şey mümkündür və “Sabah”ın mübarizə aparmaq üçün real imkanları var.Hazırda Yunanıstanda çıxış edən müdafiəçi gələcəkdə yenidən Azərbaycana qayıtmaq ehtimalını da istisna etməyib. O, Azərbaycanda keçirdiyi iki ili xoş xatirələrlə yadda saxladığını, Bakı şəhərini və ölkədəki insanları sevdiyini qeyd edib. Çakla Azərbaycan futbolunun ildən-ilə inkişaf etdiyini vurğulayaraq, gələcək karyerasında ölkəyə dönüş variantını açıq saxladığını bildirib.Qeyd edək ki, Sofian Çakla 2023-2025-ci illərdə “Sabah”ın heyətində çıxış edib.
