Gürcüstan Dəmir Yollarında baş verən böyük korrupsiya işi ilə bağlı aparılan araşdırmalar nəticəsində 8 nəfər cinayət məsuliyyətinə cəlb olunub.
Gürcüstan Dəmir Yollarının sabiq baş direktoru Davit Peradze böyük korrupsiya işi üzrə axtarışa verilib. Gürcüstan Dövlət Təhlükəsizliyi Xidmətinin yaydığı məlumata görə, şirkətin əmlaklarının qanunsuz mənimsənilməsi ilə bağlı aparılan əməliyyat-axtarış və istintaq tədbirləri nəticəsində 8 nəfər cinayət məsuliyyətinə cəlb edilib.Araşdırmalar zamanı müəyyən olunub ki, iş üzrə iki şəxsə qiyabi ittiham irəli sürülüb və onlar barəsində beynəlxalq axtarış tədbirləri həyata keçirilir. Həmin şəxslərdən biri 2017-2024-cü illərdə Gürcüstan Dəmir Yollarına rəhbərlik etmiş Davit Peradzedir.İstintaqın məlumatına əsasən, Peradze 2019-cu ilin payızında şirkətə məxsus iri həcmdə əmlakların qanunsuz şəkildə ələ keçirilməsi məqsədilə mütəşəkkil cinayətkar qrup yaradıb. İddialara görə, qrup əvvəlcədən hazırlanmış sxem əsasında dəmir yolu müəssisəsinə məxsus metallom tullantılarını real həcmi müəyyən edilməyəcək formada toplayıb, daşıyıb, emal edib və müxtəlif şirkətlər vasitəsilə qanunsuz şəkildə rəsmiləşdirib.Nəticədə ümumi çəkisi 22 min 120 ton olan metal qırıntısının qanunsuz mənimsənildiyi, daha sonra isə leqallaşdırılaraq 17 milyon 391 min 121 lari məbləğinə satıldığı bildirilib. Əldə olunan gəlirin isə cinayətkar qrup üzvləri arasında bölüşdürüldüyü qeyd olunub.Bundan əlavə, istintaq zamanı 2022-ci ildə Gürcüstan Dəmir Yolları ilə “Raveldi” MMC arasında bağlanmış, dəyəri 999 min 768 ABŞ dolları olan relslərin təmiri müqaviləsində də maliyyə pozuntularının aşkar edildiyi açıqlanıb. Təhvil-təslim sənədlərində iş həcmlərinin süni şəkildə artırıldığı müəyyən olunub.Hazırda cinayət işi üzrə istintaq davam etdirilir. Gürcüstan DTX cinayətkar sxemin digər iştirakçılarının müəyyənləşdirilməsi istiqamətində araşdırmaları davam etdirir. İttiham olunan şəxsləri 9 ildən 12 ilədək həbs cəzası gözləyə bilər.
