Müəllimlərin işə qəbulu (MİQ) üzrə müsabiqənin test imtahanı mərhələsinə iyulun 14-dən start veriləcək.
Elpress.az xəbər verir ki, Bu barədə Məktəbəqədər və Ümumi Təhsil üzrə Dövlət Agentliyinin İmtahan və qiymətləndirmə şöbəsinin müdiri Nurlan İsmayılbəyli məlumat verib. Onun sözlərinə görə, imtahanların təşkili üçün ölkənin 23 şəhərində yerləşən 56 imtahan mərkəzi tam hazır vəziyyətə gətirilib. Bu infrastruktur sayəsində eyni vaxtda 11 mindən çox namizədin imtahanda iştirak etməsi mümkün olacaq.Bildirilib ki, əvvəlki illərdən fərqli olaraq, bu il yaradılan imkanlar və iştirakçı sayının nəzərə alınması nəticəsində ibtidai sinif müəllimliyi üzrə namizədlər də digər fənlər kimi eyni gün və eyni saatda imtahan verəcəklər.Qeyd edək ki, müəllimlərin işə qəbulu üzrə müsabiqə bu ildən ödənişli əsaslarla keçirilir və iştirak haqqı 60 manat təşkil edir. Bununla yanaşı, qanunvericiliyə əsasən müsabiqədə ilk dəfə iştirak edən namizədlər, şəhid ailəsi üzvləri, müharibə veteranları, əlilliyi olan şəxslər və ünvanlı dövlət sosial yardımı alan ailələrin üzvləri ödənişdən azad edilirlər.
