“Retro Holding” MMC-də xaricdən diri heyvanların alınması üçün ayrılan vəsaitin mənimsənilməsi ilə bağlı cinayət işi üzrə istintaq başa çatıb. Şirkətin baş mütəxəssisi Rüfət Səfiyev həbs edilib.
Elpress.az xəbər verir ki, Rüfət Qalib oğlu Səfiyev 1 milyon 500 min manat məbləğində vəsaiti mənimsəməkdə ittiham olunur. İş materiallarına əsasən, həmin pul xarici ölkələrdən diri heyvanların satın alınması üçün nəzərdə tutulub.
Cinayət işi Bakı Şəhər Baş Polis İdarəsində araşdırılıb. Səfiyevə Cinayət Məcəlləsinin xüsusilə külli miqdarda mənimsəməni nəzərdə tutan 179.4-cü maddəsi ilə ittiham irəli sürülüb və barəsində həbs qətimkan tədbiri seçilib.
İlkin istintaq mərhələsi yekunlaşıb. İşin yaxın vaxtlarda məhkəməyə çıxarılacağı gözlənilir. İttiham sübuta yetirilərsə, Rüfət Səfiyev 14 ilədək azadlıqdan məhrum edilə bilər.
Qeyd edək ki, “Retro Holding” Azərbaycanda müxtəlif sahələrdə, o cümlədən diri heyvan idxalı üzrə fəaliyyət göstərir.
