Elpress.az “Report”a istinadən xəbər verir ki, Lerik rayonunda ağır yol-nəqliyyat hadisəsi baş verib.
Hadisə Lənkəran-Lerik avtomobil yolunda qeydə alınıb. İlkin məlumata görə, Astara sakini, 1989-cu il təvəllüdlü Elnur Qurbanlının idarə etdiyi “Opel” markalı minik avtomobili hərəkətdə olarkən idarəetmədən çıxaraq dərəyə yuvarlanıb.
Qəza nəticəsində sürücü Elnur Qurbanlı, onun həyat yoldaşı, 1995-ci il təvəllüdlü Aidə Qurbanlı, azyaşlı övladı N.Qurbanlı, həmçinin 1989-cu il təvəllüdlü Rəvanə Əliyeva müxtəlif dərəcəli bədən xəsarətləri alıblar.
Yaralılar hadisə yerinə toplaşan vətəndaşların köməyi ilə avtomobildən çıxarılaraq təcili tibbi yardım vasitəsilə xəstəxanaya çatdırılıblar. Onların vəziyyəti ilə bağlı əlavə məlumat verilməyib.
Faktla bağlı hüquq-mühafizə orqanları tərəfindən araşdırma aparılır, qəzanın başvermə səbəbləri müəyyənləşdirilir.
