Elpress.az xəbər verir ki, İran parlamentinin sədri Məhəmməd Baqir Qalibaf ilə Livan parlamentinin spikeri Nəbih Berri arasında telefon danışığı baş tutub. Tərəflər bölgədəki son vəziyyəti, xüsusilə də Livandakı təhlükəsizlik məsələlərini müzakirə ediblər.
İran mediasının yaydığı məlumata görə, telefon söhbəti zamanı iki ölkə arasında əməkdaşlıq və qarşılıqlı maraq doğuran digər məsələlər ətrafında da fikir mübadiləsi aparılıb.
Bu arada, İran Xarici İşlər Nazirliyinin sözçüsü İsmayıl Bəqai İsrailin Livandakı hərbi əməliyyatlarına münasibət bildirərək, ABŞ-ın İsrail ordusunu ölkənin bütün ərazilərində əməliyyatları dayandırmağa məcbur etmək üçün təsir imkanlarından istifadə etməsinin vacibliyini vurğulayıb.
O, həmçinin Tehranın İsrail qoşunlarının Livan ərazisindən çıxarılması ilə bağlı qrafikin daha qısa müddətdə müəyyən edilməsini tələb etdiyini qeyd edib.
Qeyd edək ki, bundan əvvəl İsrail Müdafiə Ordusu Livanın cənubunda yerləşən Nəbatiyyə bölgəsində radikal Hizbullah hərəkatının bir neçə üzvünün zərərsizləşdirildiyini açıqlamışdı. Bu hadisə bölgədə onsuz da yüksək olan gərginliyi daha da artırıb.
