Bakıda 85 və 67 saylı marşrut avtobuslarının iştirakı ilə baş verən yol-nəqliyyat hadisəsi ilə bağlı yeni təfərrüatlar məlum olub.
Elpress.az xəbər verir ki, qəza zamanı 85 saylı avtobusda olan Azərbaycanın Əməkdar artisti Elman Rəfiyev yaşadığı təhlükəli anlardan danışıb.
Aktyor sosial şəbəkə hesabında bildirib ki, toqquşma zamanı 67 saylı avtobusun güzgüsü 85 saylı avtobusun yan şüşəsini sındırıb və şüşə qırıntıları sərnişinlərin üzərinə tökülüb.
Elman Rəfiyevin sözlərinə görə, həmin an sınan şüşənin altında özü əyləşib:
“Şüşə mənim və yanımda oturan sərnişinlərin başına töküldü. Yaxşı ki, başımda şlyapa var idi, əks halda nəticə daha ağır ola bilərdi”.
Əməkdar artist bildirib ki, bu, ictimai nəqliyyatda baş verən ilk təhlükəli hadisə deyil. O, sürücülərin məsuliyyətsiz davranışını tənqid edərək sərnişinlərin həyatının təhlükəyə atıldığını vurğulayıb və zərərçəkənlərə təzminat ödənilməsinin vacibliyini qeyd edib.
Hadisə ilə bağlı araşdırma aparılır.
