Hücum nəticəsində iki Azərbaycan vətəndaşı ölüb, daha iki nəfər yaralanıb
Elpress.az xəbər verir ki, Qara dənizdə heyətində Azərbaycan vətəndaşlarının da olduğu xarici yük gəmisinə dronlarla hücum edilib. Hadisə nəticəsində iki Azərbaycan vətəndaşı həlak olub, iki nəfər isə xəsarət alıb.Məlumata görə, hadisə zamanı Aslan Əliyev və Asim Qasımov həyatını itirib. İmran Novruzov və Rauf Əliyev isə yaralanıb. Yaralılar Ukraynanın Çernomorsk şəhərində yerləşən xəstəxanaya çatdırılıb və hazırda tibbi yardım alırlar.Məsələ ilə bağlı Azərbaycanın diplomatik nümayəndəlikləri və aidiyyəti ölkələrin səlahiyyətli qurumları ilə əlaqələndirmə işləri aparılır. Yaralıların müalicədən sonra Azərbaycana qaytarılması, onlara lazımi konsulluq dəstəyinin göstərilməsi və həlak olanların cənazələri ilə bağlı prosedurların həyata keçirilməsi istiqamətində tədbirlər görülür.Azərbaycan tərəfi həlak olanların ailələrinə başsağlığı verib, yaralılara şəfa diləyib. Vətəndaşlara hərbi əməliyyatların davam etdiyi və təhlükəsizlik vəziyyətinin qeyri-sabit olduğu bölgələrə səfər etməkdən, həmin ərazilərdə işləməkdən, eləcə də bu marşrutlarda fəaliyyət göstərən nəqliyyat vasitələrində, o cümlədən gəmilərdə əmək fəaliyyəti ilə məşğul olmaqdan çəkinmək tövsiyə edilib.
