Girdiman çayının İsmayıllı rayonu, Zərnava kəndindən keçən hissəsində avtomobil suyun güclü axını nəticəsində hərəkətsiz qalaraq içindəki 5 nəfəri köməksiz vəziyyətdə saxlayıb.
FHN-in xilasetmə qrupları operativ müdaxilə edərək onların hamısını təhlükəsiz şəkildə çıxarıb. ELPRESS.az apa-a istinadən verdiyi məlumata görə, hadisə dünən gecə saatlarında baş verib. 1980-ci il təvəllüdlü Cümşüd Hüseynovun idarə etdiyi “Niva” markalı avtomobil çayda sürətli su axını ilə üzləşərək irəliləyə bilməyib. Sürücü və 4 sərnişin nəqliyyat vasitəsində köməksiz qalıb.”112″ qaynar xəttinə daxil olan çağırışa əsasən FHN-in Dövlət Yanğından Mühafizə Xidmətinin İsmayıllı Rayon Hissəsinin yanğınsöndürən-xilasediciləri dərhal hadisə yerinə yola düşüb. Əməliyyat şəraiti qiymətləndirildikdən sonra keçirilən xilasetmə tədbirləri nəticəsində avtomobildəki bütün şəxslər sağ-salamat xilas edilib.
