İsrailin mərkəzi bölgəsində baş vermiş silahlı insident faciə ilə nəticələnib. Hadisə zamanı bir nəfər həyatını itirib, azı dörd nəfər isə müxtəlif dərəcəli xəsarətlər alaraq xəstəxanaya yerləşdirilib. Hadisənin başvermə səbəbləri və hücumun təfərrüatları araşdırılır.
Silahlı insident İsrailin Koçav Yair yaşayış məntəqəsində qeydə alınıb. Hadisədən dərhal sonra əraziyə çoxsaylı polis və təhlükəsizlik qüvvələri cəlb olunub. İsrail polisi insidentlə əlaqədar iki nəfərin şübhəli şəxs qismində müəyyən edildiyini açıqlayıb. Məlumata görə, onlardan biri saxlanılaraq istintaqa təhvil verilib, digər şübhəlinin isə hadisə yerindən qaçdığı bildirilir. Hazırda onun yerinin müəyyənləşdirilməsi istiqamətində genişmiqyaslı axtarış əməliyyatı aparılır.Rəsmi məlumatlara əsasən, hadisə yaşayış məntəqəsinin yaxınlığında, İordan çayının Qərb Sahili ilə ayrılan təhlükəsizlik səddi ətrafında yerləşən üç müxtəlif nöqtədə baş verib. Bu hal təhlükəsizlik orqanlarının hadisəyə xüsusi həssaslıqla yanaşmasına səbəb olub.İlkin araşdırmalar zamanı insidentin mümkün terror hücumu xarakteri daşıdığı ehtimalı irəli sürülüb. Hüquq-mühafizə orqanları və xüsusi təyinatlı qüvvələr bölgədə təhlükəsizlik tədbirlərini maksimum səviyyəyə çatdırıb, ərazi nəzarətə götürülüb. Hadisənin bütün təfərrüatlarının müəyyənləşdirilməsi məqsədilə istintaq və əməliyyat-axtarış tədbirləri davam etdirilir.
