Yeni tədris modeli üzrə müəllimlərin peşəkar bacarıqları qiymətləndirilir
Elpress.az xəbər verir ki, Bakı Şəhər Təhsil İdarəsinin tabeliyində yeni təmayül tədris modeli tətbiq olunan ümumi təhsil müəssisələrində çalışmaq istəyən müəllimlər üçün müsahibə mərhələsi davam edir.Müsahibələrə həm yeni modelin tətbiq olunduğu məktəblərdə, həm də paytaxtın digər ümumi təhsil müəssisələrində fəaliyyət göstərən müəllimlər SMS vasitəsilə dəvət olunurlar.Qiymətləndirmə Azərbaycan dili və ədəbiyyat, riyaziyyat, tarix, coğrafiya, ingilis dili, fizika, kimya, biologiya və informatika fənləri üzrə aparılır. Müsahibə zamanı namizədlərin peşəkar bilik və bacarıqları, pedaqoji fəaliyyət göstəriciləri və tədrisin keyfiyyətinə təsir edən digər meyarlar üzrə səriştələri komissiyalar tərəfindən qiymətləndirilir.Müsahibədən uğurla keçən müəllimlərə nəticə ilə bağlı SMS vasitəsilə məlumat göndəriləcək.Hazırda yeni təmayül tədris modeli üzrə şagird və müəllimlərin qeydiyyatı da davam edir. İndiyədək qabaqcıl pedaqoji təcrübəyə malik 5 mindən çox müəllim müsahibə mərhələsində iştirak etmək üçün müraciət edib.Yeni model tam orta təhsil səviyyəsində məktəblərin akademik imkanlarının gücləndirilməsini, şagirdlərin ali təhsilə hazırlığının məktəb daxilində daha səmərəli təşkilini və onların maraq və qabiliyyətlərinə uyğun istiqamətlər üzrə inkişafını dəstəkləməyi hədəfləyir.
