Milli Hidrometeorologiya Xidməti sarı və narıncı xəbərdarlıq yayıb
Elpress.az xəbər verir ki, Milli Hidrometeorologiya Xidməti avqustun 27–30-u tarixlərində ölkə ərazisində gözlənilən küləkli hava şəraiti ilə əlaqədar sarı və narıncı xəbərdarlıq elan edib.Məlumata görə, Naxçıvan, Gəncə, Göygöl, Qazax, Ağstafa, Tovuz, Qusar, Xaçmaz, Şabran, Siyəzən, Qobustan, Şirvan, Hacıqabul, Neftçala, Ağdam, Mingəçevir, Yevlax, Tərtər, Bərdə, Biləsuvar, Salyan, Cəlilabad, Masallı, Lerik, Yardımlı, Kəlbəcər, Laçın, Füzuli, Beyləqan, İmişli, Saatlı, Sabirabad, Cəbrayıl və digər rayonlarda sarı xəbərdarlığa uyğun olaraq qərb küləyinin sürəti 13,9–20,7 metr/saniyə təşkil edəcək.Bakıda və Abşeron yarımadasında, eləcə də Goranboy, Naftalan, Culfa və Ordubad rayonlarında isə narıncı xəbərdarlıq qüvvədə olacaq. Bu ərazilərdə şimal-qərb küləyinin sürətinin 20,8–28,4 metr/saniyəyədək güclənəcəyi gözlənilir.Mütəxəssislər vətəndaşlara açıq havada ehtiyatlı olmağı, xüsusilə güclü külək zamanı təhlükəsizlik qaydalarına riayət etməyi tövsiyə edirlər.
