Alimlər göz sağlamlığı ilə Alzheimer xəstəliyi arasında əlaqəni təsdiqləyən yeni nəticələr əldə ediblər.
Elpress.az xəbər verir ki, Florida Universitetinin biotibbi mühəndisi Ruqu Fanqın rəhbərlik etdiyi araşdırma çərçivəsində 40 mindən çox insanın təxminən 63 min retina görüntüsü süni intellekt vasitəsilə təhlil olunub.Tədqiqatın nəticələri göstərib ki, gözün işığa həssas hissəsi olan retinada baş verən dəyişikliklər Alzheimer xəstəliyinin əlamətləri üzə çıxmamışdan illər əvvəl riskin müəyyən edilməsinə kömək edə bilər.Araşdırma zamanı Alzheimer diaqnozu qoyulan şəxslərdə retina damarlarının daralması, sərtləşməsi və görmə sinirində incəlmə kimi dəyişikliklər müşahidə olunub. Mütəxəssislər hesab edirlər ki, bu əlamətlər beyində gedən proseslərin erkən göstəricisi ola bilər.Alimlərin fikrincə, retina görüntülərinin biomarker kimi istifadəsi risk qrupunda olan insanların vaxtında müəyyənləşdirilməsinə, erkən müayinələrin aparılmasına və xəstəliyin inkişaf ehtimalının azaldılmasına imkan yarada bilər.Tədqiqatçılar bildirirlər ki, gələcəkdə bu üsulun yalnız Alzheimer deyil, digər neyrodegenerativ xəstəliklərin erkən diaqnostikasında da mühüm rol oynayacağı gözlənilir.
