Elpress.az xəbər verir ki, sabahdan etibarən Bakı Metropoliteninin “Xocəsən” və “Avtovağzal” stansiyalarından metroya giriş müəyyən müddət ərzində pulsuz həyata keçiriləcək.
Yeni tətbiq xətlərin ayrılması layihəsinin icrası zamanı sərnişinlərin alternativ hərəkət imkanlarını artırmaq və şəhərdə nəqliyyat yükünü daha səmərəli bölüşdürmək məqsədi daşıyır.Beləliklə, Abşeron və Qaradağın bir sıra ərazilərindən şəhər istiqamətində hərəkət edən sərnişinlər “Şamaxinka” və “20 Yanvar” ərazilərinə getmədən sözügedən stansiyalardan metro xidmətindən istifadə edə biləcəklər.
Ödənişsiz hərəkət “Xocəsən” və “Avtovağzal” stansiyalarından daxil olan sərnişinlər üçün “8 Noyabr”, “Dərnəgül”, “Azadlıq prospekti”, “Nəsimi”, “Memar Əcəmi”, “20 Yanvar”, “İnşaatçılar”, “Elmlər Akademiyası” və “Nizami” stansiyalarını əhatə edəcək.Bununla yanaşı, nəqliyyat axınlarının təhlili əsasında müəyyən avtobus marşrutlarının birbaşa bu iki metro stansiyasına yönləndirilməsi də planlaşdırılır.
Tətbiq ediləcək dəyişikliklərin Yaşıl və Bənövşəyi xətlərdən Qırmızı xəttə keçidi asanlaşdıracağı, sərnişinlərin alternativ marşrutlardan istifadəsini genişləndirəcəyi bildirilir.
Yeni yanaşma nəticəsində xətlərin ayrılması layihəsinin həyata keçirildiyi müddətdə sərnişin axınının daha balanslı təşkili, şəhərə girişlərdə ictimai nəqliyyatın hərəkətinin optimallaşdırılması və vətəndaşların vaxt və əlavə nəqliyyat xərclərinin azaldılması hədəflənir.
