Azərbaycan Prezidenti İlham Əliyev mayın 15-də Türk Dövlətləri Təşkilatının qeyri-rəsmi Zirvə görüşü çərçivəsində digər dövlət başçıları ilə birlikdə Türküstan şəhərində yerləşən “Həzrət Sultan” Muzey-Qoruğunu ziyarət edib.
Elpress.az-ın Azərtac-a istinadən verdiyi məlimata görə, Dövlət başçılarına muzey-qoruğun tarixi və fəaliyyəti barədə ətraflı məlumat təqdim olunub. Qeyd edilib ki, 1989-cu ildə yaradılan muzey-qoruq orta əsrlərə aid zəngin tarixi-mədəni irsin qorunması və gələcək nəsillərə çatdırılması məqsədi daşıyır. Burada Türk dünyasının mənəvi dəyərlərini əks etdirən nadir eksponatlar, eləcə də Xoca Əhməd Yasəvinin irsi ilə bağlı qiymətli artefaktlar nümayiş etdirilir. Muzeyin fondunda 26 mindən artıq eksponat saxlanılır.
Daha sonra nümayəndə heyətləri Türküstandakı Xoca Əhməd Yasəvi məqbərəsini ziyarət ediblər. Mərkəzi Asiyanın mühüm memarlıq incilərindən sayılan bu tarixi abidə XIV əsrin sonlarında Əmir Teymurun göstərişi ilə inşa olunub. Məqbərə məşhur sufi alimi və şairi Xoca Əhməd Yasəvinin məzarı üzərində tikilib. Kompleks vahid memarlıq üslubunda qurulub və burada müxtəlif məqsədlər üçün nəzərdə tutulmuş 35-dən çox otaq yerləşir. Tarixi və dini əhəmiyyətinə görə bu məkan İslam dünyasının mühüm mənəvi mərkəzlərindən biri hesab olunur.
