Livan, Kamboca, Bosniya və Herseqovina və Serbiyanın mina təhlükəsi ilə mübarizə təcrübəsi təqdim olunub
Elpress.az xəbər verir ki, Bakıda keçirilən 4-cü Beynəlxalq Minatəmizləmə Konfransında “Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda sonuncu panel sessiyası təşkil olunub.Paneldə Livan, Kamboca, Bosniya və Herseqovina və Serbiyadan olan nümayəndələr mina və partlayıcı sursatlarla çirklənmiş ərazilərin təmizlənməsi sahəsində təcrübələrini bölüşüblər.Livan Mina Fəaliyyəti Mərkəzinin Logistika və İnzibati Bölməsinin rəhbəri Vajdi Jaber Hyder bildirib ki, ölkəsində mina və partlayıcı qalıqlar problemi yalnız ərazilərin təmizlənməsi ilə məhdudlaşmır. Əsas hədəfin insanların təhlükəsiz şəkildə evlərinə qayıtması, dağıdılmış şəhərlərin və infrastrukturun bərpası, eləcə də normal həyat şəraitinin yenidən qurulması olduğu qeyd edilib.Onun sözlərinə görə, yeni münaqişələr nəticəsində dağıntıların altında partlayıcı qurğuların qalması vəziyyəti daha da mürəkkəbləşdirib. Buna görə ərazilərə eyni yanaşmanın tətbiq edilməsinin doğru olmadığını bildirən Hyder risklərin və humanitar ehtiyacların ayrıca qiymətləndirilməsinin, daha təhlükəli zonalarda isə əlavə təhlükəsizlik tədbirlərinin görülməsinin vacibliyini vurğulayıb.Kamboca Mina Fəaliyyəti Mərkəzinin Beynəlxalq Əməkdaşlıq və Hüquq Məsələləri üzrə baş direktoru Suonpraset Prum ölkəsinin mina və partlayıcı qalıqların təmizlənməsi istiqamətində uzunmüddətli təcrübəyə malik olduğunu deyib.O bildirib ki, 30 ildən artıq müddətdə Kambocada 3 600 kvadratkilometrdən çox ərazi minalardan təmizlənib və 4,5 milyondan artıq mina və partlayıcı qurğu məhv edilib. Buna baxmayaraq, ölkədə hələ də geniş çirklənmiş ərazilər qalmaqdadır.Suonpraset Prum yeni sərhəd münaqişələrinin vəziyyəti daha da ağırlaşdırdığını, yeni kasetli sursat çirklənməsinin yarandığını və yüz minlərlə insanın məcburi köçkün vəziyyətinə düşdüyünü qeyd edib. Kambocanın əsas məqsədinin mina təmizləmə prosesini sürətləndirmək və ölkəni 2030–2035-ci illərdə mina təhlükəsinin təsirindən azad etmək olduğu bildirilib.Bosniya və Herseqovina Mina Fəaliyyəti Mərkəzinin Mina Fəaliyyəti Departamentinin rəhbəri Tarik Serak isə ölkəsində mina probleminin miqyası və son 30 ildə görülən işlər barədə məlumat verib.O qeyd edib ki, 1996-cı ildə Bosniya və Herseqovinada təxminən 4 200 kvadratkilometr ərazi minalarla çirklənmiş və ya şübhəli ərazi hesab olunub. Həmin ərazinin 80 faizdən çoxu artıq təmizlənib. Hazırda isə 750 kvadratkilometrdən çox şübhəli ərazi qalır.Serbiya Respublikasının Mina Fəaliyyəti Mərkəzinin direktoru Bojan Glamoclija bildirib ki, ölkədə 50 milyon kvadratmetrdən çox ərazi hələ də müharibədən qalmış partlayıcı sursatlarla çirklənib. Bundan başqa, 150-dən çox ərazidə aviasiya bombaları və raketlərin qaldığı qeyd olunub.Onun sözlərinə görə, mina və partlayıcı sursatlardan təmizlənən ərazilər sonradan kənd təsərrüfatı, tikinti, yol infrastrukturu, sənaye və digər layihələrin həyata keçirilməsi üçün istifadə olunur.Panel sessiyası iştirakçıların suallarını cavablandırması ilə yekunlaşıb.
