Razılaşmanın 17 yatağı əhatə edəcəyi və hasilatın sutkada 1,5 milyon bareli keçəcəyi bildirilir
Elpress.az xəbər verir ki, Venesuelanın müvəqqəti Prezidenti Delsi Rodrigez ABŞ-la imzalanan 25 illik neft sazişinin əsas şərtlərini açıqlayıb.Onun sözlərinə görə, razılaşma ölkədə yerləşən 17 strateji neft yatağını əhatə edir. Saziş çərçivəsində neft hasilatının sutkada 1,5 milyon bareldən çoxa çatdırılması nəzərdə tutulur.Bildirilib ki, neftin orta qiymətinin bir barel üçün təxminən 65 dollar təşkil edəcəyi halda, Venesuelanın hər bareldən təqribən 19 dollar gəlir əldə etməsi planlaşdırılır. Razılaşma üzrə ölkənin ümumi gəlirlərinin 209 milyard dollardan çox olacağı gözlənilir.Sazişə əsasən, neft yataqlarından 16 faiz royalti tutulacaq, yataqlarda fəaliyyət göstərən şirkətlərin mənfəətinə isə 34 faizlik vergi tətbiq ediləcək.Razılaşma çərçivəsində Venesuela neft ehtiyatlarını, mövcud infrastrukturunu və işçi qüvvəsini təqdim edəcək. ABŞ tərəfinin isə layihələrə maliyyə kapitalı və texnologiya cəlb etməsi nəzərdə tutulur.Venesuela hökuməti hesab edir ki, nəzərdə tutulan investisiyalar yeni iş yerlərinin açılmasına, infrastrukturun yenilənməsinə və sanksiyalar səbəbindən ciddi zərər görən ölkənin neft sənayesinin bərpasına şərait yaradacaq.
