ABŞ kəşfiyyat orqanlarının yeni qiymətləndirmələrinə görə, İranın hərbi-sənaye kompleksi gözləniləndən daha sürətlə bərpa olunur və ölkə artıq pilotsuz uçuş aparatlarının – xüsusilə də hücum tipli dronların istehsalını yenidən aktiv mərhələyə keçirib. ABŞ mediasının, o cümlədən CNN telekanalının yaydığı məlumatlarda bildirilir ki, Tehran son aylarda tətbiq olunan atəşkəs dövründən maksimum şəkildə istifadə edərək zərər görmüş istehsal müəssisələrinin bir hissəsini qısa müddətdə yenidən fəaliyyətə qaytara bilib.
Məlumata əsasən, İranın hərbi sənaye obyektlərinə ABŞ və İsrail tərəfindən endirilən zərbələr raket sistemləri, dron zavodları, silah anbarları və buraxılış qurğularına ciddi ziyan vurmuşdu. Lakin Qərb kəşfiyyatının ilkin proqnozlarından fərqli olaraq, İran mühəndisləri və müdafiə sənayesi strukturları dağıdılmış infrastrukturun bərpasını sürətləndirə biliblər. ABŞ rəsmilərinin fikrincə, Tehran xüsusilə pilotsuz uçuş aparatlarının istehsalı sahəsində çevik və gizli istehsal şəbəkəsinə malikdir. Bu isə ölkəyə itkiləri qısa müddətdə kompensasiya etmək imkanı yaradır.
Ekspertlər hesab edirlər ki, İranın əsas üstünlüklərindən biri hərbi istehsalın tam şəkildə mərkəzləşdirilməməsidir. Bir çox dron və raket komponentlərinin müxtəlif bölgələrdə yerləşən kiçik müəssisələrdə hazırlanması hücumlar nəticəsində bütün istehsal sisteminin iflic olmasının qarşısını alır. ABŞ kəşfiyyat məlumatlarında vurğulanır ki, İran bəzi istehsal sahələrini yeraltı bunkerlərə və gizli obyektlərə köçürərək fəaliyyətini qoruyub saxlaya bilib.
Bəzi beynəlxalq təhlükəsizlik ekspertləri hesab edirlər ki, İranın dron və raket istehsalını sürətlə bərpa etməsi Yaxın Şərqdə yeni gərginlik riskini artıra bilər. Xüsusilə İsrail və ABŞ-nin regiondakı hərbi strategiyalarında bunun nəzərə alınacağı bildirilir. Analitiklərin qənaətinə görə, İranın hərbi potensialını qısa müddətdə yenidən formalaşdırması gələcəkdə daha genişmiqyaslı qarşıdurma ehtimallarını da gündəmə gətirə bilər.
