ABŞ-nin fəaliyyətini dayandıran aşağıbüdcəli “Spirit Airlines” aviaşirkətinə məxsus onlarla təyyarə Arizona ştatındakı səhra hava limanlarına yerləşdirilib.
Elpress.az xəbər verir ki, ABŞ-nin aşağıbüdcəli aviaşirkəti “Spirit Airlines” fəaliyyətini tam dayandırdıqdan sonra şirkətə məxsus onlarla təyyarə Arizona ştatındakı səhra hava limanlarında saxlanılmağa başlanılıb.Məlumata görə, şirkətin parlaq sarı rəngli “Airbus A320” və “Airbus A321” tipli təyyarələri quru iqlimə malik “Goodyear” və “Marana” hava limanlarına köçürülüb. Mütəxəssislər bildirirlər ki, aşağı rütubət səviyyəsi təyyarələrin paslanmasının qarşısını aldığı üçün bu ərazilər uzunmüddətli saxlanma baxımından əlverişli hesab olunur.Təyyarələrin daşınmasını həyata keçirən “Nomadic Aviation Group” şirkətinin rəhbəri Bob Allen bildirib ki, bu prosesə işsiz qalan keçmiş “Spirit Airlines” pilotları da cəlb olunub. Onun sözlərinə görə, son həftələr ərzində müxtəlif şəhərlərdən Arizonaya onlarla təyyarə köçürülüb.Qeyd olunub ki, hər bir təyyarənin mühərrikinin dəyəri 15–20 milyon dollar arasında dəyişir. Şirkət həmin təyyarələri yenidən rənglədikdən sonra digər aviaşirkətlərə satmağı və ya icarəyə verməyi planlaşdırır.Bundan əlavə, “Spirit Airlines” iflas proseduru çərçivəsində ümumi dəyəri təxminən 630 milyon dollar olan 27 təyyarənin satışına məhkəmədən icazə istəyib. Satışdan əldə ediləcək vəsaitin şirkətin borclarının ödənilməsinə yönəldilməsi nəzərdə tutulur.Qeyd edək ki, aviaşirkət pandemiyadan sonra artan əməliyyat xərcləri, yüksək borc yükü, uğursuz birləşmə cəhdləri və yanacaq qiymətlərinin bahalaşması səbəbindən ciddi maliyyə böhranı ilə üzləşmişdi. Kreditorlarla razılıq əldə olunmadığından şirkət fəaliyyətini tam dayandırıb və nəticədə təxminən 17 min əməkdaş işsiz qalıb.
