Hörmüz boğazından keçməyə cəhd göstərən azı üç xarici neft tankeri İran İnqilab Keşikçiləri Korpusunun (SEPAH) xəbərdarlığından sonra marşrutunu dəyişərək geri qayıdıb.
Məlumata görə, tankerlər rəsmi Tehranla razılaşdırılmadan boğazın cənub hissəsində yaradılmış alternativ marşrutdan istifadə etməyə çalışıblar. SEPAH-ın Hərbi Dəniz Qüvvələri yerli vaxtla səhər saat 04:00 radələrində xəbərdarlıq edərək bu keçidin qanunsuz və təhlükəli olduğunu bəyan edib.
Elpress.az xəbər verir ki, İran xarici işlər nazirinin müavini Kazım Qəribabadi bildirib ki, Hörmüz boğazından təhlükəsiz keçid yalnız İran tərəfi ilə koordinasiya əsasında həyata keçirilməlidir. Onun sözlərinə görə, bu prosedur ABŞ ilə imzalanmış İslamabad Anlaşma Memorandumunun müddəalarına uyğun tənzimlənməlidir.
İranın Körfəz suları İdarəçiliyi Administrasiyası isə xəbərdarlıq edib ki, icazəsiz keçid cəhdləri zamanı naviqasiya xidmətləri dayandırıla bilər və yaranacaq nəticələrə görə məsuliyyət birbaşa gəmi sahiblərinin üzərinə düşəcək.
