Böyük Britaniyanın Aİ ilə danışıqlara cavabdeh naziri Nik Tomas-Simonds bildirib ki, enerji təhlükəsizliyini gücləndirmək və ödənişləri azaltmaq üçün Aİ ilə əlaqələrin dərinləşdirilməsi vacibdir.
Nik Tomas-Simonds bildirib ki, London və Brüssel arasında enerji sahəsində yeni razılaşmanın əldə olunması “Brexit”dən sonra yaranmış bir sıra mənfi təsirlərin yumşaldılmasına şərait yarada bilər. Onun sözlərinə görə, mövcud enerji alış sistemi hazırda olduqca mürəkkəb, yavaş işləyən və yüksək xərclərə meyilli bir mexanizmə çevrilib. Nazir hesab edir ki, Böyük Britaniya ilə Aİ arasında elektrik enerjisi üzrə yeni saziş həm tərəflər arasında daha səmərəli əməkdaşlıq yaradacaq, həm də daha ucuz enerji təchizatına qarşılıqlı dəstək imkanlarını genişləndirəcək. O əlavə edib ki, bu cür əməkdaşlıq topdansatış enerji qiymətlərinin azalmasına gətirib çıxara bilər və nəticə etibarilə istehlakçıların aylıq enerji ödənişlərinin də aşağı düşməsinə şərait yaradar.
