Avstriyada 14 yaşdan kiçik uşaqların sosial şəbəkələrdən istifadəsi qadağan ediləcək
Elpress.az xəbər verir ki, Avstriya hökuməti uşaqların internetdə təhlükəsizliyinin artırılması məqsədilə yeni qaydalar paketini təsdiqləyib.Qanun layihəsinə əsasən, 14 yaşdan aşağı uşaqların sosial şəbəkələrdən istifadəsinə icazə verilməyəcək. Qaydaların gələn ildən qüvvəyə minməsi planlaşdırılır və sosial media platformaları üçün 2027-ci il aprelin 1-dək keçid müddəti müəyyənləşdirilib.Bu müddət ərzində platformalar uşaqlarda asılılıq yarada biləcək funksiyaları aradan qaldırmalı və ya onların azyaşlı istifadəçilər üçün əlçatanlığını məhdudlaşdırmalıdır. Tələbləri pozan şirkətləri illik dövriyyələrinin 6 faizinə qədər cərimə gözləyir.Bundan başqa, böyüklər üçün nəzərdə tutulan saytlara giriş də yaş təsdiqindən sonra mümkün olacaq. Yaş yoxlamasının ID Austria sistemi və ya özəl xidmətlər vasitəsilə aparılması nəzərdə tutulur. Sayt sahiblərinə istifadəçinin digər şəxsi məlumatları deyil, yalnız onun 18 yaşdan yuxarı olduğunu təsdiqləyən məlumat təqdim ediləcək.
