Ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən abituriyentlər üçün ixtisas seçimi prosesinə başlanılıb.
Elpress.az xəbər verir ki, Dövlət İmtahan Mərkəzinin (DİM) məlumatına görə, ixtisas seçimi avqustun 3-dən 9-dək saat 23:59-dək internet üzərindən aparılacaq.Müsabiqədə qəbul imtahanında ümumi balı 50-dən, Azərbaycan (və ya rus) dili üzrə 20-dən, riyaziyyat üzrə isə 10-dan az olmayan abituriyentlər iştirak edə bilərlər. Xüsusi qabiliyyət tələb edən ixtisaslara qəbul üçün isə ümumi balın 50-dən az olmaması və qabiliyyət imtahanından “məqbul” qiyməti alınması kifayətdir.
Abituriyentlər dövlət sifarişi və ödənişli əsaslarla ümumilikdə 12 ixtisasa qədər seçim edə bilərlər. Yerləşdirmə abituriyentin seçim ardıcıllığı nəzərə alınmaqla həyata keçiriləcək.
DİM-in məlumatına əsasən, 2026/2027-ci tədris ili üçün kolleclərə 6210 plan yeri ayrılıb. Bu il 24 545 abituriyent müsabiqə şərtlərini ödəyərək ixtisas seçiminə buraxılıb.
Qeyd edək ki, qeydiyyatdan keçməyən, lakin müsabiqə şərtini ödəyən abituriyentlər də avqustun 3-9-u tarixlərində qeydiyyatdan keçərək ixtisas seçimində iştirak edə bilərlər.
Bundan əlavə, ixtisas seçimi ilə bağlı DİM-in müxtəlif ali təhsil müəssisələrində və regional bölmələrində fəaliyyət göstərən “Abituriyent Məsləhət Mərkəzləri” abituriyentlərə ödənişsiz xidmət göstərəcək.
