Bu gün elektrik enerjisi ilə bağlı MƏHDUDİYYƏT olacaq

Elpress.az xəbər verir ki, sentyabrın 4-də Bakı və Abşeronun bir sıra ərazilərində elektrik enerjisinin verilişində müvəqqəti fasilələr yaranacaq.
“Azərişıq” ASC-dən bildirilib ki, məhdudiyyətlər elektrik şəbəkələrində aparılacaq təmir və yenidənqurma işləri ilə əlaqədardır. Görülən tədbirlər artan yük tələbatının qarşılanması və enerji təchizatının keyfiyyətinin yüksəldilməsi məqsədi daşıyır.
Yasamal rayonunda Abbas Mirzə Şərifzadə və Tağı Şahbazi küçələrinin, həmçinin İkinci Alatava yaşayış massivinin bir hissəsində saat 10:00-dan 13:00-dək elektrik enerjisinin verilişi məhdudlaşdırılacaq.
Xətai rayonunda, Kazımağa Kərimov küçəsində 10 kV-luq elektrik xəttində aparılacaq işlərlə əlaqədar saat 10:00-dan 15:00-dək enerji təchizatı dayandırılacaq.
Masazır qəsəbəsində isə 110/35/10 kV-luq “Masazır” yarımstansiyasında aparılacaq yenidənqurma işləri səbəbindən saat 01:00-dan 03:00-dək fasilə olacaq.
Məhdudiyyət Masazırın Heydər Əliyev, Zərifə Əliyeva, Rafiq Dünyamalıyev və İlham Vahid küçələrinin bəzi hissələrini əhatə edəcək.
Təmir işləri başa çatdıqdan sonra qeyd olunan ərazilərdə abonentlərin daha keyfiyyətli və dayanıqlı elektrik enerjisi ilə təmin olunması nəzərdə tutulur.