Ədliyyə Nazirliyinin təqdim etdiyi “Azyaşlıya pasportun verilmə ərizəsi” xidməti “mygov” platformasına inteqrasiya olunub.
Elpress.az xəbər verir ki, yeni xidmət vasitəsilə 18 yaşına çatmamış şəxslərə ümumvətəndaş pasportunun verilməsi üçün valideyn, övladlığa götürən, qəyyum və ya himayəçinin notariat qaydasında təsdiqlənmiş razılığı elektron formada rəsmiləşdirilə bilər.Bu imkan xüsusilə valideynlərdən birinin prosesdə fiziki iştirak edə bilmədiyi hallarda vətəndaşlar üçün əlavə rahatlıq yaradacaq.Xidmətdən istifadə etmək üçün “mygov” platformasında “Xidmətlər” → “Ailə” bölməsinə daxil olaraq müvafiq xidmət seçilməlidir. Sistem övladlar barədə mövcud məlumatları avtomatik göstərəcək.Müraciət zamanı tələb olunan məlumatlar daxil edildikdən sonra razılıq ərizəsi notarius tərəfindən video verifikasiya vasitəsilə təsdiqlənir.
Ödəniş həyata keçirildikdən sonra ərizənin elektron formada rəsmiləşdirilməsi tamamlanır.Vətəndaşlar müraciətin statusunu “Tarixçə” bölməsindən izləyə bilərlər.
