Xəzər rayonunun Zirə qəsəbəsində yerləşən və sakinlərin çimərlik kimi istifadə etdikləri ərazidə dəniz suyunun tünd qəhvəyi rəng alması narahatlıq doğurub.
Elpress.az xəbər verir ki, məsələ ilə bağlı Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti ərazidə araşdırmalara başlayıb.
Qurumdan bildirilib ki, əməkdaşlar tərəfindən hadisə yerinə baxış keçirilib və dəniz suyundan nümunələr götürülərək laborator analizlərə göndərilib. Analizlərin nəticələri əldə olunduqdan sonra ictimaiyyətə ətraflı məlumat veriləcək.
İlkin araşdırmalar zamanı isə sözügedən əraziyə Xəzər dənizinə doğru istiqamətlənən hər hansı axar və ya çirklənmə mənbəyi müşahidə edilməyib. Aidiyyəti qurum araşdırmaların davam etdiyini və nəticələrin rəsmi qaydada açıqlanacağını bildirib.
