Elpress.az xəbər verir ki, müdafiə naziri, general-polkovnik Zakir Həsənov Azərbaycan Ordusunun maddi-texniki təminatı, müasir silah arsenalı, texnoloji imkanları və peşəkar şəxsi heyəti ilə regionun ən güclü ordularından biri olduğunu bildirib.
Nazir bu fikirləri Milli Müdafiə Universitetinin tabeliyində fəaliyyət göstərən Heydər Əliyev adına Hərbi İnstitutun məzun buraxılışı mərasimində səsləndirib.
O qeyd edib ki, Ulu Öndər Heydər Əliyevin təməlini qoyduğu ordu quruculuğu siyasəti Prezident, Ali Baş Komandan İlham Əliyevin rəhbərliyi ilə yeni inkişaf mərhələsinə yüksəlib.
Zakir Həsənov vurğulayıb ki, Ali Baş Komandanın “Bizim ordumuz bizim qürurumuzdur” ifadəsi bu gün öz təsdiqini tapmış reallıqdır.
Müdafiə naziri xatırladıb ki, bu il 44 günlük Vətən müharibəsində qazanılan tarixi Zəfərin altıncı ildönümü qeyd olunur. Onun sözlərinə görə, həmin qələbə təkcə hərbi üstünlüyün deyil, həm də milli birliyin, siyasi iradənin və ordunun peşəkarlığının təntənəsi idi.
Zakir Həsənov məzunlara müraciət edərək bildirib ki, onlar gələcəkdə rəhbər və komandir kimi xidmət edəcək, ölkənin müdafiə potensialının daha da güclənməsinə töhfə verəcəklər.
Nazir, həmçinin zabitlərin hazırlanmasında Türkiyə Silahlı Qüvvələrinin rolunu yüksək qiymətləndirib və buna görə təşəkkürünü ifadə edib.O əlavə edib ki, Azərbaycan, Qırğızıstan və Tacikistandan olan məzunlar əldə etdikləri bilik və bacarıqlarla ölkələri arasında dostluq və əməkdaşlığın möhkəmlənməsinə də töhfə verəcəklər.
