Qlobal mənzil böhranı qadınlara daha kəskin şəkildə təsir edir və onlar münasib mənzilə çıxış zamanı bir çox sistemli çətinliklərlə qarşılaşırlar.
Elpress.az-ın Apa.az-a istinadən verdiyi məlumata əsasən, UN-Habitat-ın icraçı direktoru Anaklaudia Rossbax WUF13 çərçivəsində keçirilən dəyirmi masada çıxış edərək bildirib ki, dünyada 3 milyard insan qeyri-adekvat mənzil şəraitində yaşayır, 1 milyarddan çox insan qeyri-rəsmi yaşayış məntəqələrində məskunlaşıb, 300 milyon nəfər isə evsizlik problemi ilə üzləşib. O qeyd edib ki, bu qlobal mənzil böhranı qadınlara daha qeyri-bərabər təsir göstərir və onlar struktur, hüquqi və mədəni maneələrlə qarşılaşırlar.Onun sözlərinə görə, qadınların adekvat mənzilə çıxışında əsas problemlərdən biri ayrı-seçkilik xarakterli miras və mülkiyyət qanunlarıdır ki, bu da onların mənzil hüququnu çox vaxt kişi ilə əlaqəli münasibətlərdən asılı vəziyyətə salır. Rossbax əlavə edib ki, torpaq mülkiyyəti və kredit imkanlarına çıxışın məhdudluğu, eləcə də formal olaraq neytral görünən, lakin praktikada gender bərabərsizliyi yaradan siyasətlər mövcud vəziyyəti daha da ağırlaşdırır.O həmçinin vurğulayıb ki, adekvat mənzilin olmaması qadınları məişət zorakılığı riskinə daha açıq edir və təhlükəsiz sığınacaq olmadıqda onlar zorakılıq qarşısında daha həssas vəziyyətə düşürlər. Onun məlumatına görə, 2024-cü ildə qadın qətllərinin 60 faizi partnyor və ya ailə üzvləri tərəfindən törədilib və bu risk xüsusilə böhran dövrlərində, o cümlədən pandemiya zamanı daha da aydın şəkildə özünü göstərib.
