Prezident İlham Əliyev Azərbaycanın Ukraynanın suverenliyi və beynəlxalq səviyyədə tanınmış sərhədlərinə dəstəyinin dəyişməz olduğunu bəyan edib.
Elpress.az xəbər verir ki , Prezident İlham Əliyev bu fikirləri IV Şuşa Qlobal Media Forumunda ukraynalı jurnalist Dmitri Qordonun sualını cavablandırarkən səsləndirib.Dövlət başçısı bildirib ki, Azərbaycanın mövqeyi hər zaman beynəlxalq hüquqa əsaslanıb və ölkəmiz bundan sonra da Ukraynanın ərazi bütövlüyünü, suverenliyini və beynəlxalq səviyyədə tanınmış sərhədlərinin toxunulmazlığını dəstəkləyəcək.İlham Əliyev çıxışında işğalla heç vaxt barışmamağın vacibliyini vurğulayaraq Azərbaycanın bu məsələdə öz tarixi təcrübəsinə istinad edib. O qeyd edib ki, ölkəmiz uzun illər işğalla üzləşsə də, müxtəlif beynəlxalq təzyiqlərə baxmayaraq ərazi bütövlüyündən imtina etməyib və nəticədə torpaqlarını azad edib.Prezident həmçinin bildirib ki, heç bir dövlətin sərhədləri zor tətbiq etməklə və ya həmin ölkənin xalqının iradəsi əleyhinə dəyişdirilə bilməz. Onun sözlərinə görə, Azərbaycan bu prinsipə daim sadiq qalıb və beynəlxalq hüququn aliliyini müdafiə etməyə davam edəcək.Dövlət başçısı əlavə edib ki, Azərbaycan imkanları daxilində Ukrayna xalqına humanitar dəstəyini də davam etdirəcək. O vurğulayıb ki, bu yardım reklam məqsədi daşımır və həm dövlət, həm də cəmiyyət tərəfindən səmimi həmrəylik nümunəsi kimi göstərilir.
