Azərbaycan Prezidenti İlham Əliyev sentyabrın 24-də Çin və İtaliyanın aparıcı şirkətlərinin nümayəndələri ilə görüşüb.
Görüşdə Çinin “01.AI” və “Sinovation Ventures” şirkətlərinin baş icraçı direktoru Kei-Fu Li, İtaliyanın “TEHA Group” şirkətinin nümayəndəsi Filippo Malinverno iştirak edib.Qonaqlar Bakıda keçiriləcək II Azərbaycan Beynəlxalq İnvestisiya Forumunda iştirak edəcəklərini bildirərək tədbirin əhəmiyyətini vurğulayıblar.Dövlət başçısı Azərbaycanla Çin və İtaliya arasında əlaqələrin inkişaf etdiyini, hər iki ölkənin iş adamlarının Azərbaycana sərmayə yatırdığını qeyd edib.Söhbət zamanı ölkədə yaradılmış biznes və investisiya imkanları, həmçinin süni intellekt texnologiyalarının müxtəlif sahələrdə tətbiqi ətrafında fikir mübadiləsi aparılıb.Görüşdə xüsusilə yaşıl enerji, kibertəhlükəsizlik, təhsil və süni intellekt istiqamətlərində əməkdaşlıq perspektivləri müzakirə olunub.
Tərəflər Azərbaycanla sözügedən şirkətlər arasında gələcək əməkdaşlıq imkanlarını da nəzərdən keçiriblər.
