Azərbaycan və Çin şirkətləri neft-qaz layihələrində tərəfdaşlığı genişləndirəcək
Elpress.az xəbər verir ki, SOCAR ilə Çinin Milli Dəniz Neft Korporasiyası (“CNOOC”) arasında enerji sektorunda əməkdaşlığın genişləndirilməsini nəzərdə tutan Anlaşma Memorandumu imzalanıb.Sentyabrın 1-də SOCAR-ın prezidenti Rövşən Nəcəf “CNOOC” şirkətinin sədri Canq Şanczyan ilə görüş keçirib. Görüş zamanı iki şirkət arasında gələcək tərəfdaşlığın əsas istiqamətləri müzakirə olunub.Tərəflər dənizdə neft və qaz yataqlarının kəşfiyyatı, işlənməsi və hasilatı, həmçinin neft emalı və neft-kimya sahələrində mümkün investisiya imkanlarını nəzərdən keçiriblər. Bundan əlavə, beynəlxalq ticarət, müasir texnologiyaların tətbiqi və əməliyyatların səmərəliliyinin artırılması məsələləri ətrafında fikir mübadiləsi aparılıb.İmzalanan sənədə əsasən, Azərbaycan və digər ölkələrdə birgə “upstream” layihələrinin həyata keçirilməsi istiqamətində əməkdaşlığın qurulması planlaşdırılır.Memorandum çərçivəsində neft-qaz sənayesində texniki xidmətlərin göstərilməsi, avadanlıq və texnologiyaların təchizatı, mühəndislik, eləcə də əməliyyat və texniki dəstək sahələrində birgə fəaliyyətin genişləndirilməsi nəzərdə tutulur.
